نصــــائح منــــزلية لكل ست بيت عصريه

نصــــائح منــــزلية لكل ست بيت عصريه

وصفات جديدة وبسيطه لتجديد منزلك والحفاظ علي 

جماله باشياء سهله جدا 

1 . حطي في ملاحة الطعام .. كام حباية رز عشان الملح ميتجمدش منك في ايام الرطوبة

2 . لو عندك شرابات بيضاء اللون .. عاوزاها تبقي زي الفل ..

انقعيها الاول نص ساعة في ماية سخنه ومعاها لمونة متقطعة شرائح .. هتفرق كتير في النضافة

3 . لو بتستعملى شموع في بيتك و حابة انها تعيش و تقعد فترة اطول و متخلصش بسرعة .. حطيها قبل الاستخدام بفترة في الفريز . كده هتعيش معاكي اطول

4 . لو جبتي جزمة جديدة ليكي او لحد من اولادك او حتي جوزك و اكتشفتوا انها بتعمل صوت اثناء المشي ( بتزيأء) هاتي زيت و دفيه او سخنيه و هاتي قماشة و ادهني النعل و الجناب بيه .. والصوت هيختفى تماماً

5 . لو حطيتي كوبايتن جوا بعض و معرفتيش تخرجيهم .. حطي الكوباية الي تحت في ماية سخنه جدا .. و صبي في اللي فوق مايه ساقعة جدا . هينفصلوا بسهوله

6 . لو بتستعملى مفرمة لحمة في البيت . و حابة انك تنضفيها بسهولة ..ومن غير ما تسيب اثر لريحة اللحمة فيها .. بعد ما تخلصى الفرم هاتى قطعة عيش ناشفة و افرميها جواها .. و اغسليها . هتلاقي غسيلها سهل و مفيش روايح

7 . لو الانترية او السجادة او اي مفرش عندك اتبقع . اتعاملى مع تنضيفة بطريقة الضغط .. مش الدعك . لانك لو دعكتي البقعة هتنتشر و تكبر اكتر .. انما هتجيبي فوطة نضيفة و فيها المنضف بتاعك و تضغطي مرة ورا مرة لحد ما البقعة تختفى تدريجيا .

8. لو عندك دهون في البوتجاز صعبة التنضيف .. هتجيبي ماية دافية و نقطتين سائل تنضيف الصحون و 3 معالق كبيرة خل .. هتفرق معاكي كتير و بدعكة خفيفة الدهون هتنضف .

9 . عشان تقللى كتير من ريحة السمك المقلى جوا البيت .. حطي في الزيت الي هتقلى فيه نص لمونة او  نصيين . هتقلل من الريحة كتير

10 . لو عندك في التلاجة صدا او خدش مشوه شكلها نضفى المكان المخدوش او المصدي كويس و هاتى منوكير ابيض او كوريكتور و ادهني المكان ده و سيبيه ينشف .. و هتلاقي الشكل بقي احلى كتير من الاول

مع تمنياتي لكي دائما بالاشراق والتميز 

جمالك مهم