مرقه الدجاج البيتي

تعالي يا قمر انتي وهي اتعلمي كل حاجه ف بيتك

دى مرقة الدجاج البيتى عملتها  فى البيت حلوة جدا و موفرة و ريحة و طعم جنان و مكونتها متوفرة فى كل بيت

مرقة الدجاج البيتى

اول حاجة هتسلقى الفرخة بالطريقة المعتادة انا عن نفسى بحط فى الميه ورق لولا و حبهان و قرنفل و لمونة لومى و عود قرفة خشب و ملح و فلفل و بصلة مشقوقة بعدين تصفى الشوربة كويس و تجيبى حلة تحطى فيها نص كوباية زيت درة و لما يسخن تنزلى ب ٥ معالق دقيق و تقلبى بالمضرب اليدوى لحد ما الدقيق يستوى و يعمل فقاقيع حطى معلقة كبيرة و نص من كل من ملح و فلفل اسود و جنزبيل بودر و كارى و كركم و شطة او لو مش بتحبى الشطة اوى خليها رشة بس و نص معلقة سكر  بعدين قلبى كويس و انزلى بالشوربة حوالى لتر مع التقليب المستمر بالمضرب عشان متكلكعش لحد ما تتخن بعدين تصبيها و هى سخنة فى قوالب او فى صينية و لما تبرد خالص دخليها الفريزر اسيبكم مع الصور و ازاى تفرزيها عشان متمسكش فى بعضها و تقدرى تطلعى كل مكعب لوحده

ملحوظة
بتتقطع بعد ما تطلعيها من الفريزر عشان تبقى جمدت و مسكت نفسها و لو القالب اللى هتحطى فيه مش سيليكون او تيفال و بيلزق ادهنيه زيت الاول بالفرشة خفيف اوى

ملحوظة
بعد ما تغلفى كل مكعب هتتحفظ فى الفريزر مش فى التلاجة عشان متسحش و تعيش معاكى و تطلعى مكعب مكعب على اد استخدامك و النقطة التانية ان التوابل اللى هتتحط مع شوربة الفراخ تكونى حب و اللى مع عجينة المرقة بودرة و معلقة ونص كبيرة بتاعة الاكل من كل نوع توابل مش معلقة صغيرة بتاعة الشاى ماعدا السكر هو بس اللى نص معلقة كبير